والكلام لها هذه المرة

هذه المرة الكلام ليس كلام ريدلر، بل كلام لواحدة أخرى!
تقول: - واعذروني على اللغة العامية؛ ولكنها هكذا تكلمت هي
"هو خدعني وضحك عليا
هو مثل عليا وفهمني انه بيحب نفس الحاجات اللي انا بحبها، مقاليش هي دي شخصيتي الحقيقية ودا طبعي
يا تقبليه يا متقبليهوش
لا هو دخل لي من ناحية الحاجات اللي انا بحبها
وخلاني احس انه ممكن يكون زيي
يكون بجد كدا
لكنه طلع بيمثل
ودي مش تصرفات شريفة
دا بيسموه غش في الورق"
أجبتها:
"اللي بيحيب حد بيبقى عاوز يقربله، يدخله من الحاجات اللي هو بيحبها، دا طبيعي جدا وبيحصل من زمان
كل واحد عاوز يعرف اهتمامات حبيبه وطباعه ويقلدها"
أجابت:
"لأ مش كدا، كدا فهمت انه زيي وبيحب الحاجات اللي انا بحبها
لكنه طلع بنى ادم تاني خالص
غير اللي انا كنت فاكرة ان هو"
سألت:
"يعني انت شايفة ان غلط ان الواحد يتمثل بطباع حبيبه عشان يقربله؟"
ردت:
"اه لو كان هو نصيبي مكانش محتاج يمثل الحاجات دي
كنت هاخد بالي منه من غي تمثيل وتزييف في شخصيته"
سألتها:
"والنتيجة؟"
قالت:
"طلع كداب وبس وانا صدقت التمثيلية الهبلة دي
لكن الطبع غلاب يا محمد"
والتزمت بالصمت حتى وصلنا.....